29 ივნისს, 11 საათზე, საქართველოს გოლფის ფედერაციის ორგანიზებით, საქართველოს ღია ჩემპიონატი გოლფში ქალთა შორის ჩატარდება, რომელიც გაიმართება „თბილისი ჰილსის“ გოლფის მოედნებზე. ჩემპიონატში 15-ზე მეტი მოყვარული სპორტსმენი მიიღებს მონაწილეობას, მათ შორის უცხოელებიც. ამის შესახებ „ინტერპრესნიუსს“„თბილისი ჰილსიდან“ აცნობეს.
საქართველოს გოლფის ფედერაცია 2007 წელს დაარსდა და ევროპის გოლფის ასოციაციის წევრი 2014 წელს გახდა.
"18-19 მაისს ჩავატარეთ საქართველოს პირველი ეროვნული ჩემპიონატი გოლფში მამაკაცთა შორის. ახლა მოხარულები ვართ, რომ ტარდება ქალთა ჩემპიონატიც. მადლობა Tbilisi Hills Golf & Residence-ს. მადლობა ჩვენს სპონსორებს. ველოდებით ყველა დაინტერესებულ ქალბატონს,"- განაცხადა გოლფის ფედერაციის პრეზიდენტმა მიშა ძაძამიამ.
საქართველოს ღია ჩემპიონატის მხარდამჭერები არიან: განათლების, მეცნიერების, კულტურისა და სპორტის სამინისტრო, ეროვნული ოლიმპიური კომიტეტი და „თბილისი ჰილსი“.
„თბილისი ჰილსის“ გოლფ კლუბი არის პირველი პროფესიონალური 18-ფოსოიანი კლუბი საქართველოში, რომელიც მდებარეობს ქვემო თელეთში, ძველი თბილისიდან სულ რაღაც 15 წუთის მანძილზე. კლუბი მსოფლიოს პრესტიჟული გოლფ კლუბების და ასევე „European Tour Properties”-ის წევრია“.
„მოხარულები ვართ, რომ მოგვეცა საშუალება ვუმასპინძლოთ საქართველოს ღია ჩემპიონატს გოლფში, „თბილისი ჰილსის“ გოლფ კლუბში, ეს იქნება დიდი ტრადიციის დასაწყისი, რომელიც ხელს შეუწყობს გოლფის განვითარებას საქართველოში," - განაცხადა „თბილისი ჰილსის“ გოლფ კლუბის დირექტორმა პოლ პოჰმა.