მოსკოვის რაიონულმა სასამართლომ რუსი ოპოზიციონერი პოლიტიკოსი ალექსეი ნავალნი ათი დღით დააპატიმრა. ამის შესახებ „დოიჩე ველე“ იუწყება.
ოპოზიციონერს ბრალად 12 ივნისს ჟურნალისტ ივან გოლუნოვის მხარდასაჭერ მიტინგში მონაწილეობა ედება, რომელიც ხელისუფლებასთან არ იყო შეთანხმებული.
პოლიტიკოსის ადვოკატის ვადიმ კობზევის განცხადებით, ნავალნის დაკავება უშუალოდ პოლიტიკურ მოტივს უკავშირდება. სასამართლო დარბაზში ალექსეი ნავალნიმ განცხადება გააკეთა: „მოსკოვში არჩევნები ტარდება. მე აქტიურად ვმართავ კამპანიას პარტია „ედინაია რასიას“ წინააღმდეგ. იმისთვის, რომ დამოუკიდებელი კანდიდატები მხარდაჭერის გარეშე დატოვონ, საჭიროა ჩემი იზოლირება“, - განაცხადა ნავალნიმ.
8 სექტემბერს მოსკოვში ქალაქის სათათბიროს არჩევნები ტარდება.