სააპელაციო სასამართლო ნიკა მელიას საქმესთან დაკავშირებით ინფორმაციას ავრცელებს

თბილისის სააპელაციო სასამართლო „ერთიანი ნაციონალური მოძრაობის“ ბრალდებული წევრის, ნიკა მელიას მიმართ თბილისის საქალაქო სასამართლოს მიერ გამოტანილი განჩინების ძალაში დატოვებასთან დაკავშირებით, ინფორმაციას ავრცელებს.

როგორც მათ მიერ გავრცელებულ ინფორმაციაშია აღნიშნული, სააპელაციო სასამართლოს გადაწყვეტილებით, ბრალდებულ ნიკანორ მელიას მიმართ გამოყენებული იქნა ელექტრონული მონიტორინგი, რომლის უზრუნველყოფა დაევალა საქართველოს გენერალურ პროკურატურას.

„თბილისის სააპელაციო სასამართლოს 2019 წლის პირველ ივლისს, სააპელაციო საჩივრით მომართა საქართველოს გენერალურმა პროკურორმა სისხლის სამართლის საქმეზე ბრალდებულ ნიკანორ მელიას მიმართ თბილისის საქალაქო სასამართლოს 2019 წლის 27 ივნისს მიღებული განჩინების გაუქმების და მისთვის აღკვეთის ღონისძიების სახით პატიმრობის შეფარდების მოთხოვნით.

თბილისის სააპელაციო სასამართლოს ასევე საჩივრით მომართა ბრალდებულ ნიკანორ მელიას ინტერესების დამცველმა ადვოკატმა, რომელმაც მოითხოვა ნიკანორ მელიას მიმართ საქალაქო სასამართლოს განჩინებით დაკისრებული დამატებითი შეზღუდვის ღონისძიებების გაუქმება.

თბილისის სააპელაციო სასამართლოს საგამოძიებო კოლეგიამ დასაშვებად ცნო წარმოდგენილი საჩივრები და მიუთითა, რომ ნიკანორ მელიას ადვოკატის საჩივარი ზეპირი მოსმენის სხდომაზე საჭიროებდა საჩივრის ფარგლებისა და მოთხოვნის დაზუსტებას. სასამართლო სხდომის მიმდინარეობისას გამოიკვეთა, რომ ბრალდებულ ნიკანორ მელიას ადვოკატმა მოითხოვა მხოლოდ ბრალდებულის მიმართ გამოყენებული დამატებითი ღონისძიების გაუქმება და არ გაასაჩივრა აღკვეთის ღონისძიების სახე. საქართველოს სისხლის სამართლის საპროცესო კოდექსის 207-ე მუხლი მხარეებს უფლებას აძლევს, სააპელაციო საჩივრით გაასაჩივრონ პირველი ინსტანციის სასამართლოს განჩინება, რომელიც შეეხება აღკვეთის ღონისძიების კონკრეტული სახის გამოყენებას, შეცვლას ან გაუქმებას.

საქართველოს სისხლის სამართლის 199-ე მუხლის პირველი ნაწილი იმპერატიულად განსაზღვრავს აღკვეთის ღონისძიების სახეების ჩამონათვალს. ბრალდებულ ნიკანორ მელიას მიმართ დამატებით გამოყენებული ვალდებულებები კი არ წარმოადგენს აღკვეთის ღონისძიების სახეს და მისი აღკვეთის ღონისძიებებისგან განყენებულად გასაჩივრებას სისხლის სამართლის საპროცესო კოდექსი არ ითვალისწინებს. სააპელაციო სასამართლო შესაბამისად ვერ იმსჯელებდა ზემოაღნიშნული საჩივრის დაკმაყოფილების შესახებ.

თბილისის სააპელაციო სასამართლოს საგამოძიებო კოლეგიამ ასევე არ დააკმაყოფილა საქართველოს გენერალური პროკურორის სააპელაციო საჩივარი, რითაც უარი ეთქვა საქართველოს გენერალური პროკურორს ბრალდებულ ნიკანორ მელიას მიმართ, აღკვეთის ღონისძიების სახით პატიმრობის გამოყენების მოთხოვნაზე და ძალაში დატოვა თბილისის საქალაქო სასამართლოს განჩინება. ამასთან, სააპელაციო სასამართლოს გადაწყვეტილებით, ბრალდებულ ნიკანორ მელიას მიმართ გამოყენებული იქნა ელექტრონული მონიტორინგი, რომლის უზრუნველყოფა დაევალა საქართველოს გენერალურ პროკურატურას”, - ნათქვამია სააპელაციო სასამართლოს მიერ გავრცელებულ ინფორმაციაში.

ვიქტორ ყიფიანი - ევროკავშირი საქართველოს  რეგიონში მთავარ პარტნიორად მიიჩნევს და აღნიშნავს, რომ საქართველო სრულადაა ჩართული „აღმოსავლეთ პარტნიორობის“  მრავალმხრიან  არქიტექტურაში
ქართული პრესის მიმოხილვა 20.02.2020
ზაალ ანჯაფარიძე - საარჩევნო სისტემაზე ხელისუფლებასთან მოლაპარაკებებზე შეიძლება წამოვიდნენ ის პარტიები, რომლებსაც „ნაციონალების“ წინაშე რაიმე ვალდებულებები არ გააჩნიათ
„ტერაბანკმა“ იურიდიული პირებისთვის მობაილბანკი შექმნა
JTI საქართველოში ისევ საუკეთესო დამსაქმებელია
სამშენებლო პროექტი - იდეიდან უძრავ ქონებამდე
უპრეცედენტო შეთავაზება "სილქნეტისგან" - ახალი აბონენტები ინტერნეტისა და ტელევიზიის მაქსიმალურ პაკეტებს სპეციალურ ფასად გაიაქტიურებენ