საქართველოს ფინანსთა მინისტრმა გამოსცა საჯარო გადაწყვეტილება, რომლითაც განიმარტა კრიპტოაქტივის (კრიპტოვალუტის) და მის მოსაპოვებლად გამოთვლითი სიჩქარის (სიმძლავრის) მიწოდების ოპერაციების გადასახადებით დაბეგვრის საკითხები.

აღნიშნული გადაწყვეტილების მიხედვით, განიმარტა, რომ: კრიპტოაქტივის მიწოდება (კრიპტოაქტივის გაცვლა ეროვნულ ან უცხოურ ვალუტაზე) გათავისუფლებულია დღგ-სგან; ფიზიკური პირის მიერ კრიპტოაქტივის მიწოდებით მიღებული შემოსავალი გათავისუფლებულია საშემოსავლო გადასახადისგან; კრიპტოაქტივის მოსაპოვებლად გამოთვლითი სიჩქარის (სიმძლავრის) მიწოდება არ იბეგრება დღგ-ით, თუ ამ მომსახურების მიწოდება ხორციელდება საქართველოს ფარგლებს გარეთ; კრიპტოაქტივის მოსაპოვებლად გამოთვლითი სიჩქარის (სიმძლავრის) მიწოდება, როგორც ნებისმიერი სხვა ელექტრონული მომსახურება, იბეგრება დღგ-ით, თუ მომსახურება გაიწევა საქართველოში.