ჟენევის მოლაპარაკებების მონაწილეებმაც იციან, რომ ამ ხელისუფლებას არ შეუძლია და არ აქვს პოლიტიკური ნება, ქვეყნის სასარგებლო პოლიტიკა წარმართოს, - ამის შესახებ “ევროპული საქართველოს” წევრმა ზურაბ ჭიაბერაშვილმა ჟურნალისტებს განუცხადა. მისი თქმით, იმისთვის, რომ მოლაპარაკებების ამჟამინდელ რაუნდზე კონკრეტული შედეგი მივიღოთ, რუსეთმა და საქართველოს პარტნიორებმა უნდა იცოდნენ, რომ საქართველოს გამართული საგარეო პოლიტიკა აქვს.

„იმისთვის, რომ ჟენევის მოლაპარაკებები ქვეყანამ თავის სასარგებლოდ გამოიყენოს, ამისთვის მნიშვნელოვანია, რომ ჩვენმა პარტნიორებმაც და პირველ რიგში რუსეთმა იცოდეს, რომ ქვეყანას აქვს გამართული საგარეო პოლიტიკა, მიმართული ჩვენი ქვეყნის დეოკუპაციისა და ტერიტორიული მთლიანობის აღდგენისაკენ. როდესაც ქვეყნის ხელისუფლებას გავრილოვები ჩამოჰყავს და პარლმენტის თავმჯდომარის სავარძელში სვამს, ჟენევის მოლაპარაკებების მონაწილეებმაც იციან, რომ ამ ხელისუფლებას არ შეუძლია და არ აქვს პოლიტიკური ნება ქვეყნის სასარგებლო პოლიტიკა წარმართოს”,- აცხადებს ზურაბ ჭიაბერაშვილი.