იურიდიულ საკითხთა კომიტეტის თავმჯდომარე ანრი ოხანაშვილი არ ადასტურებს ინფორმაციას იმის თაობაზე, რომ გუნდში რომან კაკულიასა და მარიამ ჯაშის მიერ თანამდებობების დატოვების საკითხი განიხილება. ოხანაშვილის თქმით, საკითხი დღის წესრიგში დღეს არ დგას და არც უმრავლესობის წინა შეხვედრაზე განხილულა.
„ვერ გეტყვით წინმსწრებად პროგნოზს. ნებისმიერი საკითხი, რომელსაც გუნდში ვმსჯელობთ რჩება გუნდში. აქედან გამომდინარე, რაც გუნდში არის მსჯელობის საგანი ამ ეტაპზე კამერების წინ ვერ დავაფიქსირებ. ნებისმიერი სახის გადაწყვეტილება, რომელიც იქნება მიღებული გუნდის მიერ ნებისმიერ საკითხთან დაკავშირებით ძალიან დროულად ეცნობება საზოგადოებას”,-აცხადებს ანრი ოხანაშვილი.
მარიამ ჯაში განათლების, მეცნიერებისა და კულტურის კომიტეტის თავმჯდომარეა, ხოლო რომან კაკულია - დარგობრივი ეკონომიკისა და ეკონომიკური პოლიტიკის კომიტეტის თავმჯდომარე.
შეგახსენებთ, რომ პარლამენტმა ნიკა მელიას პატიმრებაზე პროკურატურისთვის თანხმობის მიცემის საკითხს მხარი დაუჭირა. აღნიშნული დადგენილება 26 ივნისს პლენარულ სხდომაზე 91 ხმით, არც ერთის წინააღმდეგ მიიღეს. ამით ნიკა მელიას დეპუტატის იმუნიტეტი შეუჩერდა. თუმცა კენჭისყრაში მონაწილეობა არ მიუღიათ უმრავლესობის რამდენიმე დეპუტატს, მათ შორის: რომან კაკულიას, მარიამ ჯაშს და ბიძინა გეგიძეს. ამასთან, მარიამ ჯაშს და ბიძინა გეგიძეს არც რეგისტრაცია გაუვლიათ.