საქართველოში რუსი ტურისტებისთვის საფრთხე ჯერ არ არსებობს, მაგრამ უპასუხისმგებლო განცხადებებმა შესაძლოა, ეს საფრთხე გამოიწვიოს. „რია ნოვოსტის“ ინფორმაციით, ამის შესახებ რუსეთის საგარეო საქმეთა მინისტრის მოადგილე გრიგორი კარასინმა ჟენევის დისკუსიების მორიგი რაუნდის დასრულების შემდეგ ჟურნალისტებს განუცხადა.

„სიტყვა „სანქციები“ სრულიად არასწორია - ეს ადეკვატური რეაქციაა იმ საფრთხეებზე, რომელთა პოტენციური არსებობა შესაძლებელი იყო ჩვენი ტურისტებისთვის. კარგია, რომ ისინი ჯერ არ არსებობს, მაგრამ ისინი შესაძლოა გაჩნდეს ნებისმიერ მომენტში, როდესაც ასეთი მოწოდებები არის. უპასუხისმგებლო განცხადებები ჟღერს ძალიან ბევრი, ამ ატმოსფეროში სახელმწიფომ უნდა აიღოს საკუთარ თავზე ინიციატივა და ყველაფერი გააკეთოს, რათა არ დაზარალდნენ ადამიანები, ჩვენი მოქალაქეები“, - განაცხადა კარასინმა.

ავიაგადაზიდვებზე შეზღუდვების მოხსნის შესახებ შესაძლო ვადებთან დაკავშირებით, კარასინმა განაცხადა, რომ რუსეთი არავის პირობებს არ უყენებს. „ეს დამოკიდებულია ყველაფერზე. ჩვენ არასოდეს არავის ვუყენებთ პირობებს. ვითარება ნორმალიზდება, თუკი ყველაფერი გაცილებით პროგნოზირებადი გახდება, რბილად და ინტელიგენტურად, კეთილმეზობლურად. ეს შემოქმედებითი საკითხია“, - განაცხადა კარასინმა.