ვეტერანების საქმეთა სახელმწიფო სამსახურის, სოციალურ საკითხთა და სააღრიცხვო-ანალიტიკური დეპარტამენტის უფროსმა ამურ რევიშვილმა, დეპარტამენტის თანამშრომელმა ვაჟა დალაქიშვილმა და კახეთის რეგიონული სამმართველოს უფროსმა, თამაზ კალატოზიშვილმა, ლაგოდეხში მცხოვრებ მეორე მსოფლიო ომის მონაწილე, 97 წლის შშმ ვეტერანს, შალვა ყანჩაშვილს ადაპტირებული სამედიცინო ეტლი გადასცეს.
ადაპტირებული ეტლი გადაეცა, ასევე, თელავში მცხოვრებ შშმ პირს, უშანგი კუკუნაშვილს, რომელიც აფხაზეთის ომში უგზო-უკვლოდ დაკარგული გოდერძი კუკუნაშვილის მამაა.
ეტლების გადაცემა მემორანდუმის ფარგლებში მიმდინარეობს, რომელიც ვეტერანების საქმეთა სახელმწიფო სამსახურსა და ორგანიზაცია „საქართველოს ქალები მშვიდობისა და სიცოცხლისათვის“ შორის გაფორმდა. აქცია კვლავაც გაგრძელდება და ეტლებს საქართველოს სხვადასხვა რეგიონში მცხოვრები შეზღუდული შესაძლებლობების მქონე ვეტერანები ეტაპობრივად მიიღებენ.
ინფორმაციას ვეტერანების საქმეთა სახელმწიფო სამსახური ავრცელებს.