ავსტრალიელი სტუდენტი, რომელიც ჩრდილოეთ კორეაში იყო დაკავებული, გათავისუფლებულია. 29 წლის ალეკ სიგლი, რომელიც ჩრდილოეთ კორეის დედაქალაქ ფხენიანში სწავლობდა, 25 ივნისს დაიკარგა.
ის ამჟამად ჩინეთში იმყოფება. ალეკ სიგლიმ აეროპორტში ჟურნალისტებს განუცხადა, რომ ყველაფერი წესრიგში აქვს. მან არ ილაპარაკა იმაზე, თუ რა შეემთხვა ჩრდილოეთ კორეაში.
ავსტრალიის პრემიერ-მინისტრმა სკოტ მორისონმა პარლამენტის სხდომა შეაჩერა, რათა მიეღო დაზუსტებული ცნობა სიგლის გათავისუფლების შესახებ.
მოგვიანებით მან განაცხადა, რომ ავსტრალიას სტუდენტის გათავისუფლებაში შვედეთის ხელისუფლება დაეხმარა.
ამ ინფორმაციას „როიტერსი“ ავრცელებს.