ხელისუფლებისაკენ ხელის გაშვერა მარტივია, რადგან ძალა ხელისუფლებას აქვს, მაგრამ ის, რომ 20 ივნისის აქციაზე პოლიტიკოსებმა ხმა არ ამოიღეს და აგრესიულ ჯგუფებს ძალადობის შეჩერებისკენ არ მოუწოდეს, ეს მძიმე პოლიტიკური პასუხისმგებლობა და დანაშაულია, - ამის შესახებ “ინტერპრესნიუსს“ პარლამენტის თავდაცვისა და უშიშროების კომიტეტის თავმჯდომარემ ირაკლი სესიაშვილმა განუცხადა.
სესიაშვილის აზრით, თუკი „ნაციონალური მოძრაობისა“ და „ევროპული საქართველოს“ წარმომადგენლებს ძალადობის გაგრძელება არ უნდოდათ და თვლიდნენ, რომ ეს ძალადობა მათ მიერ არ იყო ორგანიზებული, შესაბამისი განცხადება უნდა გაკეთებინათ.
“მათგან არც ერთი არ გამოსულა და აქციის მონაწილეებისთვის ძალადობის შეწყეტისაკენ არ მოუწოდებიათ. გარდა იმისა, რომ მიატოვეს და დაიმალნენ, მათზე იყო პოლიტიკური პასუხისმგებლობა, რადგან ამბობდნენ, რომ ისინი იყვნენ აქციის ორგანიზატორები. ერთი განცხადებაც რომ გაეკეთებინათ, ვიფიქრებდი, რომ ეს აგრესიული ძალა საკუთარ აგრესიას გამოხატავდა, რასაც პოლიტიკოსები გაემიჯნენ, მაგრამ ამას არავინ არ გაემიჯნა, პირიქით - მოგვიანებით დავინახეთ, რომ სიტუაციის ორგანიზებას ნიკა მელია ახდენდა“, - აღნიშნა სესიაშვილმა “ინტერპრესნიუსთან“ საუბრისას.