საქართველოს სახეა კულტურა და ვფიქრობ, ამ დარგში ახალი ძალა და ენერგიაა საჭირო, - ასე ეხმაურება საპარლამენტო უმრავლესობის ლიდერი გია ვოლსკი განათლების, მეცნიერების, კულტურის და სპორტის მინისტრის მოადგილის მიხეილ გიორგაძის პოსტიდან წასვლას.

„დარგი მისახედია. ბევრი კულტურის ძეგლია, რომელიც მნიშვნელოვნად იქნა წარმოჩენილი, ბევრი კულტურული ღონისძიება ჩატარდა, მაგრამ ეს არ არის საკმარისი, მეტი უნდა იყოს. საქართველოს სახეა კულტურა და ვფიქრობ, ამ დარგში ახალი ძალა და ენერგიაა საჭირო",- აღნიშნა ვოლსკიმ.

რაც შეეხება კითხვას, ხომ არ არის კავშირი მწერლების პროტესტსა და გიორგაძის წასვლას შორის, ვოლსკი ამბობს, რომ ასე არ არის.

„რაც შეეხება მწერლების პროტესტს, რასაკვირველია, მსოფლიოს ყველა ქვეყანაში მწერლების ერთ ჯგუფს ან ხელოვანთა ერთ ჯგუფს ყოველთვის აქვს რადიკალურად დაპირისპირებული დამოკიდებულება, ზოგს კრიტიკული და ეს უნდა ახასიათებდეს კიდეც მათ. დამოკიდებული შემოქმედებითი ჯგუფი ან ადამიანი ხელოვნებაში ვერაფერს მიაღწევს",- განაცხადა ვოლსკიმ.