ჩვენი საერთაშორისო პარტნიორებისთვის საკმაოდ ნათლად არის გასაგები რას ნიშნავს, ის სამართლებრივ-პოლიტიკური შევიწროება, რომელიც ხელისუფლებამ ოპოზიციის წინააღმდეგ დაიწყო,- ამის შესახებ „ნაციონალური მოძრაობის” დეპუტატმა სალომე სამადაშვილმა ფრაქცია “ერთიანი ნაციონალური მოძრაობის” წევრებსა და დიპლომატიური კორპუსის წარმომადგენლებს შორის შეხვედრის დასრულების შემდეგ განაცხადა. მისი თქმით, დღესვე დიპლომატიურ კორპუსს საკონსტიტუციო ცვლილებების თაობაზე “ნაციონალური მოძრაობის” პოზიცია განემარტა.

„ნიკა მელიას საქმე განვიხილეთ, რომელსაც ეზღუდება მისი უფლებამოსილების განხორციელების კონსტიტუციური შესაძლებლობა - სახელმწიფო არღვევს კონსტიტუციას. საუბარი გვქონდა პოლიტიკურ დევნაზე, რომელიც გუშინ პროკურატურამ დაანონსა. საუბარი გვქონდა საკონსტიტუციო ცვლილებებზე, განვმარტეთ ჩვენი პოზიცია. ვფიქრობთ, რომ ჩვენი საერთაშორისო პარტნიორებისთვის საკმაოდ გასაგებია რას ნიშნავს ის სამართლებრივ-პოლიტიკური შევიწროება, რომელიც ხელისუფლებამ ოპოზიციის წინააღმდეგ დაიწყო. თუნდაც ის ფაქტი, რომ დღეს ნიკა მელია არ ესწრებოდა ამ შეხვედრას, რადგან გაურკვეველია აქვს თუ არა მას გადაადგილების უფლება, მათ შორის პარლამენტში, რომ მოვიდეს და შეხვდეს დიპლომატებს”,-აცხადებს სალომე სამადაშვილი.