თუ ვიღაცას ბინა აქვს რუსეთში, ნამდვილად არ მგონია ეს რაიმე პრობლემას წარმოადგენდეს, თუნდაც ბიზნეს ინტერესები ჰქონდეს, ამაში პრობლემას ვერ ვხედავ, - ამის შესახებ თბილისის მერმა, კახა კალაძემ ჟურნალისტებს განუცხადა, როდესაც უპასუხა დასმულ კითხვას, რომლის მიხედვით, "აი ფაქტმა" მოამზადა გამოძიება, რომლის თანახმად, „ქართული ოცნების" თბილისის საკრებულოს დეპუტატები რუსულ ფინანსებზე არიან დამოკიდებულები და ანაბრები აქვთ ისეთ რუსულ ბანკებში, რომლებიც "ოკუპაციის შესახებ კანონს" არღვევენ.
როგორც კალაძემ აღნიშნა, პირადად "აიფაქტის" გამოძიებას არ ენდობა და ამის საფუძველიც აქვს. მისი თქმით, ბიზნესის განხორციელების მხრივ რუსეთში პრობლემას ვერ ხედავს და ასევე პრობლემას ვერ ხედავს იმაში, რომ რუსმა ინვესტორებმა ბიზნესი აწარმოონ.
„პირადად ჩემთან მიმართებაში იყო ძალიან ბევრი შემთხვევა, როდესაც ისინი ცრუ ინფორმაციებს ავრცელებდნენ და ამის თაობაზე მე არაერთხელ მომიწია განმარტებების გაკეთება. მაქვს საფუძველი იმისა, რომ მათ არ ვენდო და მეორე, თუ ვიღაცას ბინა აქვს რუსეთში, ეს დანაშაულია?! მე, ამაში პრობლემას ვერ ვხედავ და საერთოდ, რა გვიკვირს, როდესაც ისეთი მსხვილი რუსული კომპანიები, მაგალითად, ენერგეტიკაში დღეს საქართველოში არიან, სხვადასხვა მიმართულებით აწარმოებენ თავიანთ საქმიანობას. ხომ, ვიცით, ეს როდის და რომელ წლებში განხორციელდა?! ასე, რომ თუ ვიღაცას, ბინა აქვს რუსეთში, ნამდვილად არმგონია ეს რაიმე პრობლემას წარმოადგენდეს",- განაცხადა კალაძემ.