„ცენტრ პოინტ ჯგუფის“ საქმეზე, ბათუმის „თეთრი მაგნოლიას“ ეპიზოდზე ბრალდებულების, მაია და გუკა რჩეულიშვილების სასამართლო პროცესი გადაიდო. სასამართლო სხდომა 26 ივლისს, 16:00 საათზე გაიმართება.

პროცესის გადადების მიზეზი სხდომაზე მაია რჩეულიშვილისა და მისი ადვოკატის ბექა ბასილაიას გამოუცხადებლობა გახდა. როგორც სასამართლო პროცესზე გუკა რჩეულიშვილმა განაცხადა, ბექა ბასილაია რუსთაველის გამზირზე მოშიმშილეთა შორის ერთ-ერთია. სწორედ, აღნიშნულის გამო ვერ შეძლო მან სხდომაზე გამოცხადება.

„ბექა ბასილაიას ვესაუბრე, მინდოდა მეთქვა, რომ შიმშილობა შეეწყვიტა, ძალიან დასუსტებულია, მაგრამ ვერაფერზე დავითანხმე", - განაცხადა რჩეულიშვილმა.

„თეთრი მაგნოლიას“ ეპიზოდზე ბრალდებულები არიან მაია და გუკა რჩეულიშვილები. მათ სახელმწიფო ბრალდება მენაშენეების კუთვნილი დიდი ოდენობით თანხების მითვისებას ედავება.