საქართველოს ოკუპირებული ტერიტორიების საკითხი, განსაკუთრებით ჰუმანიტარული და ადამიანის უფლებების მდგომარეობის თვალსაზრისით ერთ-ერთი პრიორიტეტული მიმართულებაა საერთაშორისო საზოგადოებისთვის, - ამის შესახებ ჟურნალისტებს საგარეო საქმეთა მინისტრის მოადგილემ ლაშა დარსალიამ ეუთო-ს რეზოლუციის პროექტის შეფასებისას განუცხადა. როგორც მან აღნიშნა, სწორედ ჰუმანიტარული და ადამიანის უფლებრივი მდგომარეობის თაობაზე არსებული მძიმე ვითარების პრიორიტეტულობის მაგალითია ეუთო-ს რეზოლუციის პროექტიც.
„ყველა საერთაშორისო ორგანიზაციაში ჩვენი მთავარი ამოცანაა, რომ იქ არსებულ მძიმე ჰუმანიტარულ და ადამიანის უფლებრივ მდგომარეობას ხაზი გაესვას და ეს იყოს ერთ-ერთი მნიშვნელოვანი საკითხი საერთაშორისო დღის წესრიგის. ეს რეზოლუციაც ერთ-ერთი ასეთი მაგალითია სწორედ იმის, რომ საერთაშორისო საზოგადოებისთვის, ადამიანის უფლებების თვალსაზრისით ოკუპირებულ ტერიტორიებზე არსებული ვითარება ერთ-ერთი პრიორიტეტული საკითხია“, - განაცხადა ლაშა დარსალიამ.
ლუქსემბურგში, ეუთო-ს საპარლამენტო ასამბლეის პოლიტიკური საკითხების კომიტეტი რეზოლუციის პროექტს განიხილავს, რომელიც ეხება აღმოსავლეთ უკრაინაში მიმდინარე კონფლიქტს და ყირიმს, კონფლიქტებს საქართველოში, მოლდოვასა და აზერბაიჯანში.