აქციის საქმეზე დაკავებულთათვის აღკვეთის ღონისძიების სახით პატიმრობის შეფარდებას ერთ-ერთი ბრალდებულის ოჯახის წევრების პროტესტი მოჰყვა. ზურაბ ბუდაღაშვილის დედამ და ძმამ სასამართლოს განაჩენი გააპროტესტეს და პროკურატურის წარმომადგენლებს ეკითხებოდნენ „რატომ ღუპავდნენ ახალგაზრდებს“.
„საცოდავ სახელმწიფოში ვცხოვრობთ. შეხედეთ ამ პროკურორებს“, - განაცხადა ზურაბ ბუდაღაშვილის დედამ მაგული გობეჯიშვილმა ჟურნალისტებთან საუბარში.
შეგახსენებთ, რომ 20-21 ივნისს, რუსთაველის გამზირზე, პარლამენტის წინ განვითარებული მოვლენების დროს ჯგუფური ძალადობის ბრალდებით დაკავებულ ოთხივე პირს: ცოტნე სოსელიას, ბესიკ თამლიანს, კახაბერ კუპრეიშვილსა და ზურაბ ბუდაღაშვილს აღკვეთის ღონისძიების სახით პატიმრობა შეეფარდა.
ცოტნე სოსელიას, ბესიკ თამლიანს, კახაბერ კუპრეიშვილსა და ზურაბ ბუდაღაშვილს ბრალი ოფიციალურად გუშინ წაუყენეს. მათ სისხლის სამართლის კოდექსის 225-ე მუხლით გათვალისწინებული დანაშაულის ჩადენა ედებათ ბრალად, რაც ჯგუფურ ძალადობაში მონაწილეობას გულისხმობს.