„თბილისი პრაიდის“ მოწინააღმდეგეები 19:00 საათზე ვაკის პარკში შეკრებას გეგმავენ

გურამ ფალავანდიშვილის ინფორმაციით, 8 ივლისს „თბილისი პრაიდის“ მიერ დაგეგმილი „ღირსების მარშის“ გაპროტესტებას დღეს დაიწყებენ, რის გამოც, ისინი 19:00 საათზე თბილისში, ვაკის პარკში შეიკრიბებიან. ამის შესახებ გურამ ფალავანდიშვილმა საკუთარ ფეისბუქგვერდზე დაწერა.

ამასთან, მისი განმარტებით, „ღირსების მარშის“ ჩასაშლელად, ისინი 8 ივლისს, 10:00 საათიდან დაიწყებენ შეკრებას.

„8 ივლისს, დილის 10 საათიდან ვერის პარკში ვიკრიბებით დაანონსებული ლგბტ პრაიდის ჩასაშლელად. რადგან საათი და ადგილი არ არის ცნობილი, ვფიქრობთ, ვერის პარკი ოპტიმალური ადგილია შესაკრებად, ვერის პარკიდან ქალაქის ყველა ძირითადი ლოკაცია 2 ნაბიჯშია“, - წერს სოციალურ ქსელში გურამ ფალავანდიშვილი.

შეგახსენებთ, რომ „თბილისი პრაიდის“ ინფორმაციით, „ღირსების მარში“ ხვალ 8 ივლისს გაიმართება, თუმცა კონკრეტული ლოკაცია და დრო ცნობილი არ არის.