ნათია თურნავა - ტურისტული ბიზნესის ყველაზე მოწყვლადი სეგმენტისთვის - მცირე სასტუმროებისთვის საბანკო სესხის პროცენტის თანადაფინანსებას უზრუნველვყოფთ

მივიღეთ ორი მნიშვნელოვანი გადაწყვეტილება - ტურისტული ბიზნესის ყველაზე უფრო მოწყვლადი სეგმენტის - მცირე სასტუმროებისთვის საბანკო სესხების პროცენტების თანადაფინანსებას უზრუნველვყოფთ,-ამის შესახებ მედიის წარმომადგენლებთან ნათია თურნავამ ბიზნესასოციაციასთან გამართული შეხვედრის შემდეგ განაცხადა, რომელსაც საქართველოს პრემიერ-მინისტრი, მამუკა ბახტაძეც ესწრებოდა.

ნათია თურნავას თქმით, ბიზნესასოციაციაში იმ კონკრეტულ ნაბიჯებზე იმსჯელეს, რომელთა გადადგმასაც ხელისუფლება ტურიზმის ბიზნესისთვის იმ შესაძლო ზიანის შესამსუბუქებლად აპირებს, რაც რუსეთის გადაწყვეტილების გამო დაუდგება.

„შევისწავლეთ, რა გასაჭირი უდგათ მცირე სასტუმროებს, რადგან ეს არის ყველაზე უფრო მოწყვლადი სეგმენტი, რომელიც დარტყმის ქვეშ დგება. აქედან გამომდინარე, გადავწყვიტეთ, რომ მივიღოთ მონაწილეობა მათი საბანკო სესხების პროცენტის თანადაფინანსებაში, რადგან მთავარი პრობლემა, რაც მესმოდა სექტორთან გამართული შეხვედრების დროს, არის სესხის, ასე ვთქვათ, ტვირთი და ჩვენ ბიზნესს ამ ტვირთის შემსუბუქებაში დავეხმარებით“, - აღნიშნა ეკონომიკის მინისტრმა.

მისივე განცხადებით, მიღებულია მეორე მნიშვნელოვანი გადაწყვეტილებაც, რომ საკრედიტო-საგარანტიო მექანიზმის ფარგლებში პრიორიტეტი მიენიჭოს ტურიზმის ინდუსტრიას და სასტუმრო ბიზნესს, რათა განვითარებისა და გაფართოების ახალი პროექტები არ გაჩერდეს.

„ჩვენ ამ რესურსს მოვახმართ თანაუზრუნველყოფას, როდესაც ბანკი განიხილავს და გასცემს სესხს ახალი სასტუმროს მშენებლობისთვის ან არსებული ტურისტული ბიზნესის გაფართოებისთვის“, - განაცხადა ეკონომიკის მინისტრმა.

ნათია თურნავას შეფასებით, ამ ორი მნიშვნელოვანი გადაწყვეტილებით არსებულ ტურისტულ ბიზნესს, მცირე სასტუმროებს მთავრობა უმსუბუქებს ფინანსურ კრიზისს, ასევე ძალიან კარგ პერსპექტივას აძლევს სამომავლო განვითარებისთვის .

„გარდა ამისა, ძალიან აგრესიული, მარკეტინგული სტრატეგია გვექნება ქვეყნის უსაფრთხო იმიჯის განმტკიცებისთვის, რადგან ეს არის ძალიან დიდი მოთხოვნა და ამასთან ერთად, ყველაფერს გავაკეთებთ ტრადიციული ბაზრების შესანარჩუნებლად“, - ნათია თურნავამ.

აღნიშნულ ინფორმაციას ეკონომიკისა და მდგრადი განვითარების სამინისტრო ავრცელებს.

ლადო პაპავა - საქართველოში სტაბილურად არასტაბილური ვითარება მხოლოდ რუსეთის ინტერესებშია
ქართული პრესის მიმოხილვა 24.02.2020
ვიქტორ ყიფიანი - ევროკავშირი საქართველოს  რეგიონში მთავარ პარტნიორად მიიჩნევს და აღნიშნავს, რომ საქართველო სრულადაა ჩართული „აღმოსავლეთ პარტნიორობის“  მრავალმხრიან  არქიტექტურაში