სახალხო დამცველი პარლამენტთან მიმდინარე და მის პარალელურად დაგეგმილ აქციასთან დაკავშირებით განცხადებას ავრცელებს

საქართველოს სახალხო დამცველი რუსთაველის გამზირზე მიმდინარე და მის პარალელურად დაგეგმილ აქციებს ეხმიანება. არსებული ვითარების გათვალისწინებით, სახალხო დამცველი მოუწოდებს პარლამენტის შენობასთან მიმდინარე და მის პარალელურად დაგეგმილი აქციის მონაწილეებს, გამოყონ ორგანიზატორი პირები, რომელთა შორის კონსტრუქციული მოლაპარაკებების გამართვა შესაძლებელს გახდის ორივე აქციის შეუფერხებელ და მშვიდ გარემოში ჩატარებას.

როგორც „ინტერპრესნიუსს“ სახალხო დამცველის აპარატიდან აცნობეს,საქართველოს სახალხო დამცველი ასევე მოუწოდებს საქართველოს შინაგან საქმეთა სამინისტროს, მაქსიმალურად შეუწყოს ხელი მოქალაქეთა მშვიდობიანი ფორმით გამოხატვას და უზრუნველყონ რუსთაველის გამზირზე შეკრებილი ყველა პირის მიერ შეკრების უფლების სრულფასოვანი რეალიზება.

„საქართველოს სახალხო დამცველი აქტიურად ადევნებს თვალს მთელი დღის განმავლობაში რუსთაველის გამზირზე მიმდინარე მოვლენებს. „თბილისი პრაიდის“ მოწინააღმდეგე ჯგუფები პარლამენტის შენობის წინ დღეს დილიდან მას შემდეგ შეიკრიბნენ, რაც „თბილისი პრაიდის“ ორგანიზატორების მიერ დაანონსებული ღირსების მარში გაუქმდა. შეკრებილი პირები ანტიდისკრიმინაციული კანონის გაუქმებას და „თბილისი პრაიდის“ აკრძალვას ითხოვენ. გარდა ამისა, მანიფესტანტები აცხადებენ, რომ სამოქალაქო აქტივისტებს არ მისცემენ ანტისაოკუპაციო აქციების გაგრძელების შესაძლებლობას.

აღსანიშნავია, რომ საქართველოს პარლამენტის შენობის წინ 20-21 ივნისს განვითარებული მოვლენების შემდეგ, უკვე 2 კვირაზე მეტია მიმდინარეობს სამოქალაქო აქტივისტების მიერ ორგანიზებული მშვიდობიანი აქცია - “სირცხვილია“ საქართველოს შინაგან საქმეთა მინისტრის გადადგომის მოთხოვნით. ორგანიზატორების განცხადებით, აღნიშნული აქცია დღეს, 19:00 საათზე უნდა განახლდეს. აქციის შეუფერხებლად მიმდინარეობის უზრუნველსაყოფად, ადგილზე განლაგებულია შესაბამისი აპარატურა და ბანერები.

სახალხო დამცველი აქციის მონაწილეებს შეახსენებს, რომ დაუშვებელია აქციის მიმდინარეობისას ძალადობრივი ან/და კანონსაწინააღმდეგო ქმედებების განხორციელება, აგრეთვე სხვა შეკრების მოწყობის ანდა მასში მონაწილეობის უფლების განხორციელებისთვის უკანონოდ ხელის შეშლა. აღნიშნული წესების დარღვევისთვის შეკრების მონაწილეებისა და ორგანიზატორების მიმართ საქართველოს კანონმდებლობა ითვალისწინებს როგორც ადმინისტრაციულ, ასევე სისხლისსამართლებრივ პასუხისმგებლობას. ამასთან, ხაზი უნდა გაესვას აქციის ორგანიზატორის პასუხისმგებლობას, მიმართოს ყველა გონივრულ ქმედებას, რათა თავიდან აირიდოს და აღმოფხვრას მანიფესტანტების მხრიდან კანონმდებლობის მოთხოვნათა დარღვევის შემთხვევები“,-ნათქვამია განცხადებაში.

მამუკა ხაზარაძე - ცვლილებების დროა! ხელისუფლება, რომელიც ემსახურება რუსეთს, უნდა დასრულდეს! „ლელო“ ემსახურება საქართველოს!
ემილ ავდალიანი - არაბული ქვეყნებისთვის და ირანისთვის ახლო აღმოსავლეთის რეგიონთან ჩინეთის ურთიერთობის სუფთა წარსული მეტად მიმზიდველია
ქართული პრესის მიმოხილვა 28.03.2024
საქართველოს თავდაცვის დილემა - რთული არჩევანი რთულ ვითარებაში
ამერიკული სამედიცინო ჰოლდინგი - CooperSurgical-ი საქართველოში ოვამედის ორგანიზებით სამდღიან სემინარს მართავს