რუსეთის პრეზიდენტთან არსებული ადამიანის უფლებების საბჭო რუსეთის ფედერაციის უფლებადამცველის ტატიანა მოსკალკოვას წინადადებას დაეთანხმა - შენარჩუნდეს ჰუმანიტარული კორიდორი ბავშვებისა და მრავალშვილიანი ოჯახების დასახმარებლად, საქართველოში ფულადი გზავნილების აკრძალვის შესახებ საკითხის განხილვისას. ამის შესახებ „რია ნოვოსტის“ ცნობით, საბჭოს ხელმძღვანელმა მიხეილ ფედოტოვმა განაცხადა.
მისი თქმით, ყველაფერი უნდა გაკეთდეს, რომ ქართველი პოლიტიკოსებისა და პროპაგანდისტების ანტირუსული გამოხდომების გამო არ დაზარალდეს უბრალო ადამიანების ინტერესები - რუსეთისა და საქართველოს მოქალაქეები.
„ჩვენ ერთად უნდა ვიცხოვროთ მრავალი ასწლეული. ისე უნდა გავაკეთოთ, რომ ვინც ეწინააღმდეგება რუსეთისა და საქართველოს ურთიერთობათა ნორმალიზაციას, დარჩნენ წარსულში და ხელი არ შეგვიშალონ ჩვენ, ჩვენ ხალხს ნორმალური მეზობლობის შენებაში“ - განაცხადა ფედოტოვმა.
მისი თქმით, საქართველოს მხრიდან, რა თქმა უნდა, შეურაცხყოფას პასუხის გაცემა სჭირდება, მაგრამ შეურაცხყოფას შეურაცხყოფით არ უნდა უპასუხო. ~„არ შეიძლება ისეთი პასუხის გაცემა, რომ ამის გამო უბრალო ადამიანები დაზარალდნენ, რადგან მათ ჩვენთვის შეურაცხყოფა არ მოუყენებიათ“ - განაცხადა საბჭოს ხელმძღვანელმა.