შსს-ს ამ დრომდე აპარატურა აქვს დაპატიმრებული, რომელიც გუშინ აქციის ადგილიდან მოიპარა,-ამის შესახებ "ევროპული საქართველოს" წევრმა ირმა ნადირაშვილმა ჟურნალისტებს ბრიფინგზე განუცხადა. ნადირაშვილი შსს-ს მოუწოდებს, შეატყობინოს სად არის აპარატურა, რომლითაც მიტინგი უნდა გახმოვანდეს. ნადირაშვილი ასევე მოუწოდებს მოქალაქეებს, მივიდნენ დღეს, 19:00 საათზე პარლამენტის წინ.

"ეს არის აქციის გასახმოვანებელი აპარატურა, რომელიც სარგებლობისთვის გადავეცით აქციის ორგანიზატორ ახალგაზრდებს. შსს აბსლუტურად თავხედურად იქცევა. ამ დრომდე ვერ მივაგენით სად არის აპარატურა. პოლიციის სხვადასხვა განყოფილება გვამისამართებს სხვადასხვა ადგილას და გვეუბნებიან, რომ აპარატურა იქ არის დასაწყობებული, მაგრამ სერიოზული პასუხი ამ საკითხზე ვერ მივიღეთ. პირადად მე მქონდა მცდელობა შს მინისტრის მოადგილე ნათია მეზვრიშვილთა დაკავშირების, მაგრამ მას ამ ვითარებაშიც კი თავხედობა ჰყოფნის, არ პასუხობს ზარებს და არ რეაგირებს ჩემს ტექსტურ შეტყობინებებზე“, - განაცხადა ნადირაშვილმა და დასძინა, რომ ერთი კითხვა აქვს- რატომ იქცევა შსს ასე და რატომ არ აბრუნებს აპარატურას, რომლის საშუალებითაც დღეს, საღამოს უნდა გახმოვანდეს მიტინგი.

„სამწუხაროა, რომ შსს დაბრუნდა იმ დროში, როდესაც სამინისტროს ხელმძღვანელობდა კახა თარგამაძე, იტაცებენ ადამიანებს, იპარავენ აპარატურას, დაკავებულ ადამიანებს მოექცნენ ძალიან ცუდად - მათ სატელეფონო ზარების განხორციელებისა და წყლის დალევის საშუალებაც არ მისცეს ოთხი საათის განმავლობაში და ჯალათი გახარია, რომელმაც თვალის ჩინი დაუკარგა ადამიანებს, ახლა ცდილობს ხმაც ჩაუხშოს მიტინგს. მაგრამ, ეს ცხადია, ასე ვერ მოხერხდება. ის, რომ გუშინ რუსთაველი სუს-თან შეკრულმა ადამიანებმა დაიკავეს და დღეს ამ ხერხებით ცდილობენ ჩაშალონ ეს ღონისძიება, აზრს მოკლებულია",-აცხადებს ირმა ნადირაშვილი.

იხილეთ ვიდეო