იუსტიციის უმაღლესმა საბჭომ უზენაესი სასამართლოს მოსამართლეობის კანდიდატებთან გასაუბრების თარიღი დანიშნა. როგორც საბჭოს დღევანდელ სხდომაზე გახდა ცნობილი, საბჭო 17 ივლისს, 11:00 საათზე უმაღლესი ინსტანციის სასამართლოს მოსამართლეობის 50 კანდიდატიდან თავდაპირველად 5 კანდიდატს მოუსმენს. კანდიდატებთან გასაუბრების პროცესი ანბანის თანმიმდევრობით წარიმართება.

შეგახსენებთ, იუსტიციის უმაღლესმა საბჭომ უზენაესი სასამართლოს მოსამართლეობის 137 მსურველიდან უკვე შეადგინა ე.წ. გრძელი სია, რომელიც 50 კანდიდატისგან შედგება. უზენაესი სასამართლოს მოსამართლეობისთვის ფარული კენჭისყრის შედეგად, 50 კანდიდატიდან 20 შეირჩევა. იუსტიციის უმაღლესი საბჭოდან პარლამენტს განსახილველად სწორედ ეს 20 კაციანი სია გადაეგზავნება.