პარლამენტის წინ გიორგი გახარიას გადადგომის მოთხოვნით აქცია განახლდა

რუსთაველის გამზირზე, საქართველოს პარლამენტის შენობის წინ გიორგი გახარიას გადადგომის მოთხოვნით აქცია განახლდა. პროტესტის მონაწილეები უკვე 22-ე დღეა, შს მინისტრის გიორგი გახარიას გადადგომას ითხოვენ. აქციის ერთ-ერთი ორგანიზატორის გეგა სალუქვაძის თქმით, დღეს სცენა რიგით მოქალაქეებს დაეთმობათ, მათ, ვისაც სურთ საკუთარი პროტესტი პარლამენტის წინ ღიად გამოხატონ.

პარალელურად, მე-17 დღეა, აქციის რამდენიმე მონაწილე შიმშილობას აგრძელებს. აქციის ერთ-ერთი ორგანიზატორის გეგა სალუქვაძის ინფორმაციით, მათი ჯანმრთელობის მდგომარეობა უარესდება და ორგანიზატორები ცდილობენ მოშიმშილეებთან მოლაპარაკებას, რომ შიმშილობა შეწყვიტონ.

მიტინგის მონაწილეების თქმით, ისინი პროტესტს მანამდე გააგრძელებენ, ვიდრე მათი მოთხოვნა არ დაკმაყოფილდება და შს მინისტრი თანამდებობას არ დატოვებს.