„ერთიანი ნაციონალური“ მოძრაობის წევრი, ხატია დეკანოიძე საგამოძიებო უწყებაში გამოკითხვაზე მისვლას არ აპირებს.
როგორც დეკანოიძემ „ინტერპრესნიუსს“ განუცხადა, ის ჩვენებას სასამართლოში, მაგისტრატი მოსამართლის თანდასწრებით მისცემს.
„აუცილებლად მივალ სასამართლო დარბაზში მაგსიტრატ მოსამართლესთან და გავცემ კითხვებს პასუხს, ვინაიდან საზოგადოებამ ამ საქმის გარშემო ყველა დეტალი უნდა იცოდეს. ძალიან დიდი უტიფრობაა, როცა თვითონ გახარია იძიებს გავრილოვის ღამესთან დაკავშირებულ მოვლენებს, როცა თვითონ უნდა იყოს ამ მოვლენებზე პასუხისმგებელი“, - აცხადებს დეკანოიძე.
მისთვის უცნობია, თუ როდის დაიბარებენ სასამართლოში დაკითხვაზე.
ცნობისთვის, ოპოზიციონერი ლიდერები - ხატია დეკანოიძე, გუბაზ სანიკიძე, ირაკლი ღლონტი და ბაჩუკი ქარდავა შს სამინისტრომ გამოკითხვაზე 12 ივლისს დაიბარა. ისინი სსკ-ის 225-ე მუხლით მიმდინარე გამოძიების ფარგლებში, რაც ჯგუფური ძალადობის ორგანიზებას, ხელმძღვანელობას ან მასში მონაწილეობას გულისხმობს, მოწმის სახით არიან გამოკითხვაზე დაბარებული.