აშშ-ის ელჩის მოვალეობის შემსრულებელი საქართველოში ელიზაბეთ რუდი აცხადებს, რომ 20 ივნისის ღამეს პარლამენტის შენობაში არ იმყოფებოდა. როგორც მან ჟურნალისტების კითხვის საპასუხოდ განაცხადა, ის აღნიშნულ პერიოდში ამერიკაში იმყოფებოდა.
ამასთან, ელჩის მოვალეობის შემსრულებელმა კიდევ ერთხელ გაუსვა ხაზი 20-21 ივნისს განვითარებული მოვლენების გამოძიების აუცილებლობას.
„მე არ შემიძლია კომენტარი გავაკეთო იმაზე, კონკრეტულად ვინ იმყოფებოდა 20 ივნისს პარლამენტში. პირადად მე ვიმყოფებოდი ამერიკის შეერთებულ შტატებში, ჩემი ქალიშვილის ქორწილში. 20 ივნისს განვითარებული მოვლენები ნამდვილად მოითხოვს დეტალურ გამოძიებას ძალის გამოყენების, ძალადობის კუთხით და ა.შ. კარგია, რომ ეს გამოძიება მიმდინარეობს,“ - განაცხადა რუდმა.
შინაგან საქმეთა მინისტრის გიორგი გახარიას განცხადებით, ის 20 ივნისს რამდენიმე ქვეყნის ელჩთან ერთად პარლამენტის შენობიდან აკვირდებოდა მოვლენებს.