აღმოსავლეთ პარტნიორობის კონფერენციის მეორე დღეს, განათლების, მეცნიერების, კულტურისა და სპორტის მინისტრის მოადგილემ, ირინა აბულაძემ, მე-7 სესიას უხელმძღვანელა, რომელიც ახალგაზრდა თაობის გაძლიერებასა და კულტურათა შორის კავშირების დამყარებას ეხებოდა.

როგორც „ინტერპრესნიუსს“ განათლების, მეცნიერების, კულტურისა და სპორტის სამინისტროს პრესსამსახურიდან აცნობეს, პანელის მონაწილეებმა განიხილეს ისეთი მნიშვნელოვანი საკითხები, როგორიცაა პარტნიორ ქვეყნებში განათლების ხარისხის გაუმჯობესება, ევროკავშირის განათლების, კვლევისა და ინოვაციის სისტემასთან მეტი ინტეგრაცია, ტექნოლოგიების გამოყენებით სწავლების ხელშეწყობა და კულტურათა შორის კავშირების დამყარება.

მინისტრის მოადგილემ კონფერენციის მონაწილეებს განათლების ფართომასშტაბიანი რეფორმის ძირითადი ასპექტები, მიმდინარე და დაგეგმილი პროექტები გააცნო, მათ შორის ისაუბრა კულტურისა და სპორტის მიმართულებით მოძრაობის. ირინა აბულაძემ წარმატებულ პროექტებს შორის აღმოსავლეთ პარტნიორობის ევროპული სკოლის დაარსება დაასახელა, რომელიც ევროკავშირის ექვსი პარტნიორი ქვეყნის მოსწავლეებს ინოვაციური აკადემიური პროგრამით უზრუნველყოფს და მხარს უჭერს მულტიკულტურულ თანამშრომლობას.

მინისტრის მოადგილემ თავის გამოსვლაში, პროფესიული განათლების სფეროში მიმდინარე რეფორმებზეც ისაუბრა და ხაზი გაუსვა საქართველო-ევროკავშირს შორის გაფორმებული შეთანხმების მნიშვნელობას, რომელიც საქართველოს ადამიანური კაპიტალის განვითარებას ითვალისწინებს.

უმაღლესი განათლების მიმართულებით, ირინე აბულაძემ, ხარისხის უზრუნველყოფის ევროპულ ქსელში (ENQA) საქართველოს გაწევრიანებასა და ევროკავშირის Erasmus+ პროგრამში წარმატებულ მონაწილეობაზე ისაუბრა. ასევე შეეხო მეცნიერების სფეროში ევროკავშირთან თანამშრომლობას და დადებითად შეაფასა ევროკომისიის პანევროპულ ინიციატივაში EURAXESS გაწევრიანების შესაძლებლობა.

სესიის ბოლოს ირინა აბულაძემ მონაწილეების შეკითხვებს უპასუხა.