20-21 ივნისს განვითარებული მოვლენების შედეგად ერთმა პოლიციელმა ცალ თვალში მხედველობის 95 პროცენტი დაკარგა, - ამის შესახებ „კვირის პალიტრასთან“ ინტერვიუში შს მინისტრის პირველმა მოადგილემ კახა საბანაძემ განაცხადა.

მინისტრის მოადგილემ აღნიშნა, რომ პოლიცია 2 საათის განმავლობაში, ფაქტობრივად, შიშველი ხელებით იცავდა თავს და პარლამენტის შენობას შტურმისგან. კახა საბანაძემ აღნიშნა, რომ სპეციალური საშუალებების გამოყენება მას შემდეგ გადაწყდა, რაც შეუძლებელი გახდა შტურმის შეკავება.

„პოლიცია დაახლოებით 2 საათი, ფაქტობრივად, შიშველი ხელებით, მხოლოდ ფარის ანაბარა იცავდა თავს და პარლამენტს აქტიური შტურმისგან. მაქსიმუმი კეთდებოდა იმისთვის, რომ შესაძლებლობის ფარგლებში აქტიური, კანონით გათვალისწინებული სპეცსაშუალებების გამოყენების გარეშე დაგვეცვა პარლამენტის შენობა, თუმცა 00:00 საათისთვის, შტურმის დაწყებიდან 2 საათის შემდეგ, მას შემდეგ, რაც გაიტაცეს 316 ფარი, პოლიციელებს წაართვეს ჩაფხუტები და ხელკეტები, გაიტაცეს 30 პოლიციელი და გაუსწორდნენ ფიზიკურად, გარდაუვალი გახდა აქციის დაშლა. ერთმა პოლიციელმა ცემისგან ცალ თვალში მხედველობის 95 პროცენტი დაკარგა... როცა 2 საათის განმავლობაში პოლიციელები იბრძვიან და იგერიებენ შემოტევას, ფიზიკურად შეუძლებელი გახდა შეკავება და იმისათვის, რომ პოლიციელების სიცოცხლე და ჯანმრთელობა შეგვენარჩუნებინა და ამავე დროს დაგვეცვა პარლამენტის შენობა ძალადობრივი შტურმისგან, იძულებული ვიყავით დაგვეწყო აქტიური საშუალებების გამოყენება“, - განაცხადა კახა საბანაძემ.

იხილეთ ინტერვიუს სრული ვერსია

იხილეთ ვიდეო