საქართველოს საგარეო საქმეთა მინისტრის მოადგილემ, ალექსანდრე ხვთისიაშვილმა მიიღო ერაყის რესპუბლიკის საგარეო საქმეთა მინისტრის პირველი მოადგილე, ნაზარ ისსა აბდულ-ჰადი ალ-ხაირალა. ამის შესახებ „ინტერპრესნიუსს“ საქართველოს საგარეო საქმეთა სამინისტროდან აცნობეს.

მათივე ინფორმაციით, ქართული მხარე მიესალმა ერაყის საგარეო საქმეთა სამინისტროს დელეგაციის ვიზიტს საქართველოში და აღნიშნა, რომ ორმხრივი მაღალი დონის ვიზიტები ხელს უწყობს ორ ქვეყანას შორის ურთიერთობების გაღრმავებას.

„შეხვედრაზე მხარეებმა განიხილეს ორმხრივი ურთიერთობების დღის წესრიგში არსებული აქტუალური საკითხები და თანამშრომლობის შემდგომი გაღრმავების პერსპექტივები. განსაკუთრებული ყურადღება დაეთმო ქვეყნებს შორის პოლიტიკური და ეკონომიკური კავშირების, ასევე სამართლებრივი ბაზის განმტკიცების მნიშვნელობას.

მხარეებმა ასევე განიხილეს კავკასიის რეგიონში, ახლო აღმოსავლეთსა და მსოფლიოში არსებული გამოწვევები, რომლებიც გავლენას ახდენენ მსოფლიო უსაფრთხოების გარემოზე.

ერაყულმა მხარემ კიდევ ერთხელ დაადასტურა ერაყის რესპუბლიკის მტკიცე მხარდაჭერა საქართველოს ტერიტორიული მთლიანობის მიმართ, მის საერთაშორისოდ აღიარებულ საზღვრებში“, - აღნიშნულია საგარეო საქმეთა სამინისტროს მიერ გავრცელებულ ინფორმაციაში.