თითოეული მოსამართლის, მოსამართლის ოჯახის წევრების ქცევებიც კი იქნა გაანალიზებული და შეფასებული მანამ, სანამ ევროპული სასამართლო მივიდოდა იმ დასკვნამდე, რომ დიახ, საქართველოში ამ საქმეზე სამართლიანი მართლმსაჯულება განხორციელდა, - ამის შესახებ იუსტიციის მინისტრმა თეა წულუკიანმა სტრასბურგის სასამართლოს მიერ, „რუსთავი 2“-ის საქმეზე მიღებული გადაწყვეტილების შემდეგ განაცხადა.

როგორც წულუკიანმა აღნიშნა, ეს გადაწყვეტილება ამტკიცებს იმას, რისი მოლოდინიც ჰქონდათ.

„სხვადასხვა დროს წარდგენილი 400 -ზე მეტგვერდიანი შესაგებლების, მათ შორის, მესამე მხარეების საპასუხოდ, სრულად იქნა გაზიარებული სტრასბურგის სასამართლოს მიერ. დადგინდა, რომ ქართული სასამართლოების გადაწყვეტილებები იყო სამართლიანი და სანდო. ეს არ დადგენილა ზოგადი მსჯელობის შედეგად. თქვენ ნახავთ, რომ თითოეული მოსამართლის, მოსამართლის ოჯახის წევრების ქცევებიც კი იქნა გაანალიზებული და შეფასებული მანამ, სანამ ევროპული სასამართლო მივიდოდა იმ დასკვნამდე, რომ დიახ, საქართველოში ამ საქმეზე სამართლიანი მართლმსაჯულება განხორციელდა, რომ საკუთრების უფლება და მასთან დაკავშირებული პრეტენზიები არის ევროპულ დონეზე აბსოლუტურად დაუსაბუთებელი. რაც მთავარია, გამოხატვის თავისუფლების ნაწილში სასამართლომ არც კი განიხილა დავა და ჩათვალა ის დაუშვებლად“, - განაცხადა წულუკიანმა.