ვფიქრობ, რომ ეს მათი პირველადი ემოციაა, რაც ახლა გამოხატეს, თუმცა ეს მათი შეხედულებაა, მათი უფლებაა და ამას არავინ არ უზღუდავთ, - ასე გამოეხმაურა პაატა სალია „რუსთავი 2“-ის ჟურნალისტების განცხადებას, რომლის მიხედვითაც მათ სურთ, რომ იმუშაონ ამჟამინდელ დირექტორ ნიკა გვარამიასთან.

"მე კიდევ ერთხელ ვამბობ, ჩვენ დავაფიქსირეთ, რომ არ ვაპირებთ მათ საქმიანობაში ჩარევას. ერთადერთი რაც შეიცვლება არხის დირექტორის პოზიციაა, რაც მე მგონი ბუნებრივიცაა. როდესაც კომპანიას ახალი მესაკუთრე ჰყავს აბსოლუტურად ბუნებრივია მე მგონი, რომ მას სურვილი ჰქონდეს მისი ნდობით აღჭურვილი პირი იყოს ხელმძღვანელობასა და წარმომადგენლობაზე უფლებამოსილი და არა სხვა პირი, რომელიც მას აშკარად მიკერძოებაში ადანაშაულებს, არ ენდობა და არ აქვს მასთან კარგი ურთიერთობა. როგორ წარმოგიდგენიათ კომპანიის მესაკუთრისა და დირექტორის ურთიერთობა, როდესაც მათ ერთმანეთთან ნდობითი ურთიერთობა არ აქვთ?"-განაცხადა პაატა სალიამ.

მისი თქმით, მას არც ერთ „რუსთავი 2“-ის, და არა მარტო „რუთავი 2“-ის ჟურნალისტთან ცუდი ურთიერთობა არ ჰქონია და არც აქვს.

როგორც მან ჟურანალისტებთან საუბრისას აღნიშნა, ყველანაირად ეცდება, რომ არხმა შეინარჩუნოს ის წარმატება რაც, მას აქვს და უფრო მეტი მოიპოვოს.

"კომპანიისთვის, სამეწარმეო სუბიექტისთვის წარმატება ნიშნავს იმას, რომ მას ჰქონდეს მეტი შემოსავალი და თანამშრომლებს ჰქონდეთ უკეთესი პირობები. ჩემი სურვილია, რომ არხმა შეინარჩუნოს ის წარმატება რაც მას აქვს და კიდევ უფრო მეტი მოიპოვოს", - აღნიშნა პაატა სალიამ.