ევროსასამართლომ მიიღო გადაწყვეტილება და ჩვენ ეს გადაწყვეტილება უნდა მივიღოთ, - აღნიშნულის შესახებ "საერთაშორისო გამჭვირვალობა - საქართველოს" აღმასრულებელმა დირექტორმა ეკა გიგაურმა განაცხადა.
მისი თქმით, მხარეს აქვს უფლება, რომ გაასაჩივროს აღნიშნული გადაწყვეტილება, თუმცა ახლა უნდა ვიმოქმედოთ იმ მოცემულობიდან, რაც გვაქვს.
"დღეს უკვე „რუსთავი 2“-ის მეპატრონე არის სხვა პირი და შესაბამისად, მნიშვნელოვანია, რომ უკვე ამ პირს ვთხოვოთ, მაქსიმალურად დაცული იქნას იმ ჟურნალისტების უფლებები, რომლებიც ამ არხზე მუშაობენ. თუკი ახალი მეპატრონის მიზანი მართლაც არის ის, რომ არ გაუშვან სამსახურებიდან ეს ჟურნალისტები და არ შეიცვალოს დამოუკიდებელი სარედაქციო პოლიტიკა, ამ შემთხვევაში არსებობს ძალიან ბევრი საშუალება იმისა, რომ ეს გაკეთდეს. ჩვენ ადრე განვიხილავდით მაგალითად, იგივე ბორდის შექმნას, სადაც ნდობით აღჭურვილი პირები იქნებიან და რომელთა მთავარი მიზანი იქნება ზუსტადაც ჟურნალისტების უფლებების დაცვა," - განაცხადა ეკა გიგაურმა.