“საერთაშორისო რესპუბლიკური ინსტიტუტის” (IRI) კვლევების ცენტრის მიერ გამოქვეყნებული საზოგადოებრივი აზრის გამოკითხვის შედეგების მიხედვით, პოლიტიკოსების პირად რეიტინგში “ევროპული საქართველოს” წევრი დავით ბაქრაძე ლიდერობს. ის გამოკითხულთა 59%-ს მოსწონს.

აღსანიშნავია, რომ ბიძინა ივანიშვილი რეიტინგის ათეულში ვერ შევიდა იქიდან გამომდინარე, რომ ის გამოკითხულთა მხოლოდ 35%-ს მოსწონს, 57%-ს კი არა.

შინაგან საქმეთა მინისტრმა გიორგი გახარიამ, გამოკითხულთა 40%-ის მოწონება დაიმსახურა, მაშინ როდესაც ის არ მოსწონს 47%-ს. ათეულის უკანასკნელ სამ ადგილს პრემიერ-მინისტრი მამუკა ბახტაძე, ქვეყნის პრეზიდენტი სალომე ზურაბიშვილი და გიორგი ვაშაძე შესაბამისი თანმიმდევრობით იკავებენ. აღსანიშნავია, რომ მათ შორის ყველაზე ნაკლები მოწონებით სწორედ სალომე ზურაბიშვილი სარგებლობს, ის გამოკითხულთა 57%-ს არ მოსწონს.

მმართველი პარტიიდან ყველაზე მეტი მოწონება დედაქალაქის მერმა კახა კალაძემ მოიპოვა, ის რეიტინგის მეორე ადგილს იკავებს, რაც იმას ნიშნავს, რომ კალაძე გამოკითხულთა 49%-ს მოსწონს, 43%-ს კი არა.

ათეულში სხვა პოზიციები ასე გამოიყურება: გრიგოლ ვაშაძე - მოსწონს: 48%-ს, არ მოსწონს: 43%-ს; დავით უსუფაშვილი - მოსწონს: 41-ს, არ მოსწონს: 45-ს; შალვა ნათელაშვილი - მოსწონს: 41-ს, არ მოსწონს: 50-ს; ალეკო ელისაშვილი - მოსწონს: 40-ს, არ მოსწონს: 35-ს.

იხილეთ ვიდეო