ჩინეთის ცენტრალურ ჰენანის პროვინციაში გაზის ქარხანაში მომხდარ აფეთქებას 10 ადამიანი ემსხვერპლა. დაშავდა 20-მდე ადამიანი. 5 ადამიანი კი ამ დრომდე დაკარგულია. აფეთქება იმდენად ძლიერი იყო, რომ 3 კილომეტრის რადიუსში შენობების ფანჯრები ჩაიმსხვრა. შემთხვევა ქალაქ იმაში მოხდა. გაზგამანაწილებელმა ქარხანამ მომხდარის გამო მუშაობა შეაჩერა.
აფეთქების მიზეზი ჯერჯერობით უცნობია. ქარხანა ჩინეთის სახელმწიფოს კუთვნილი კომპანიაა.
შეგახსენებთ, ჩინეთში ინდუსტრიული ავარიები ხშირია, მიუხედავად იმისა, რომ მთავრობამ ქარხნებში, მაღაროებსა და ელექტროსადგურებში უსაფრთხოების ზომების გამკაცრების გადაწყვეტილება მიიღო. მიმდინარე წლის მარტში ქიმიურ ქარხანაში აფეთქებას 60-ზე მეტი ადამიანი ემსხვერპლა.