სიმართლე გითხრათ, მე და შალვა თადუმაძემ უზენაესი სასამართლოს მოსამართლეობის კანდიდატობასთან დაკავშირებით გადაწყვეტილება ერთმანეთისგან დამოუკიდებლად მივიღეთ,- ამის შესახებ გენერალური პროკურორის პირველმა მოადგილემ, მამუკა ვასაძემ იუსტიციის საბჭოში გასაუბრების დასრულების შემდეგ ჟურნალისტებს განუცხადა, როდესაც უპასუხა კითხვას - იცოდა, თუ არა რომ უზენაესი სასამართლოს მოსამართლეობის კანდიდატი გენერალური პროკურორი შალვა თადუმაძეც არის.

„მე, ბუნებრივია, როცა მივიღე გადაწყვეტილება გამოვუცხადე ჩემს ხელმძღვანელს, რომ ასეთი სურვილი მაქვს. მისგანაც მივიღე დასტური და თვითონაც გამიმხილა, რომ მეც მაქვს ასეთი სურვილი და მეც ვაპირებ შეტანასო", - განაცხადა მამუკა ვასაძემ.

ამასთან, მამუკა ვასაძის თქმით, უზენაესი სასამართლოს მოსამართლეობის კანდიდატურობაზე რეკომენდაცია მას სხვა კოლეგებთან ერთად შალვა თადუმაძემაც გაუწია.

შეგახსენებთ, მამუკა ვასაძე 2018 წლის დეკემბრიდან გენერალური პროკურორის შალვა თადუმაძის პირველი მოადგილეა. ის უზენაესი სასამართლოს მოსამართლეობის კანდიდატია.