რუსეთის ხაბაროვსკის მხარეში, სამთო-სათხილამურო კურორტზე ბავშვთა კარვების ბანაკი დაიწვა. დაზუსტებული ცნობით, ერთი ბავშვი დაიღუპა და სამი მძიმე მდგომარეობაშია. ამ ინფორმაციას „ბი-ბი-სი“ ავრცელებს.

ტურისტული კომპლექსის „ხოლდომის“ ტერიტორიაზე მდებარე კარვების ბანაკში ხანძარი ადგილობრივი დროით 02:31 საათზე გაჩნდა. ბანაკში 7-დან 15 წლამდე ასაკის 189 ბავშვი იმყოფებოდა. ადგილობრივი ხელისუფლების ცნობით, დაღუპულ გოგონას დღეს 11 წელი უსრულდებოდა. სამი ბავშვი ძალიან მძიმე მდგომარეობაში, კომაშია. კიდევ ერთი გამონაბოლქვი გაზით არის მოწამული და მისი მდგომარეობა საშუალო სიმძიმისაა.

დაწყებულია გამოძიება. მხარის გუბერნატორის სერგეი ფურგალის განცხადებით, ბანაკი კერძო იყო და შემმოწმებელი კომისიებისგან მის გახსნაზე ნებართვა არ იყო გაცემული.

საგანგებო სიტუაციების სამინისტროს ცნობით, სულ ბანაკში 26 კარავი იყო და აქედან 20 მთლიანად დაიწვა.