ქართველი დეპუტატის პირადი ცხოვრების ამსახველი კადრები 2019 წლის იანვრის თვეში სომხეთის რესპუბლიკიდან საქართველოს მოქალაქემ გაავრცელა. აღნიშნულის შესახებ დღევანდელ ბრიფინგზე შინაგან საქმეთა სამინისტროს ცენტრალური კრიმინალური პოლიციის დეპარტამენტის დირექტორის მოვალეობის შემსრულებელმა მამუკა ჭელიძემ განაცხადა.

უწყების ცნობით, საქართველოს მოქალაქე დ.ა.-მ, რომელიც ამჟამად პატიმრობაში მკვლელობის მუხლით იმყოფება, აღნიშნული კადრები სოციალურ ქსელ „ფეისბუქის“ მესენჯერის საშუალებით, რუსეთის ფედერაციის მოქალაქე მ. დ.- სგან მიიღო.

„საერთაშორისო თანამშრომლობის ფარგლებში, სომეხი სამართალდამცველების დახმარებით, სომხეთის სასჯელაღსრულების დაწესებულებიდან ამოღებულია დ.ა.-ს მობილური ტელეფონი. კომპლექსური ექსპერტიზის შედეგად დადგინდა, რომ სწორედ ამ მოწყობილობიდან იქნა გავრცელებული ვიდეომასალა.

დ.ა.-ს და მ.დ.-ს დაუსწრებლად წარედგინათ ბრალი პირადი ცხოვრების ამსახველი კადრების გავრცელების ფაქტზე. თბილისის საქალაქო სასამართლოს განჩინებით ორივე მათგანს აღკვეთის ღონისძიების სახით შეეფარდათ პატიმრობა.

აღნიშნულ საქმეზე გრძელდება გამოძიება საქართველოს სისხლის სამართლის კოდექსის 157-ე პრიმა მუხლის პირველი და მეორე ნაწილებით, რათა დადგინდეს აღნიშნულ დანაშაულში შესაძლო მონაწილე სხვა პირების ვინაობა“, - განაცხადეს შსს-ში.

იხილეთ ვიდეო: