დასავლეთის ქვეყნები აშშ-ის ხელმძღვანელობით ცდილობენ მოგლიჯონ რუსეთს მეზობელი სახელმწიფოები, - განაცხადა რუსეთის საგარეო საქმეთა მინისტრმა სერგეი ლავროვმა ლათინურ-ამერიკულ მედიასაშუალებებთან და ტელეარხ „RT“-სთან ინტერვიუში.
„რაც შეეხება ჩვენს ურთიერთობებს საქართველოსთან, ჩვენ არასდროს მივისწრაფოდით ამ ურთიერთობის გაუარესებისკენ. სწორედ საქართველოს ხელმძღვანელობამ ადრე, მიხეილ სააკაშვილის დროს გაწყვიტა დიპლომატიური ურთიერთობები და ჩვენი ეკონომიკური ურთიერთობის ყოველნაირად შეზღუდვას ცდილობდა, მაგრამ შემდეგ ეკონომიკამ თავისი ქნა. მათ, ვინც საქართველოში მატერიალურ ფასეულობებს ქმნის, ძალიან კარგად ახსოვთ ჩვენი სავაჭრო, საინვესტიციო კავშირები რამდენად მჭიდრო იყო. ახლა ეს ვაჭრობა განახლდა და მე არ ვფიქრობ, რომ ვინმე ამისგან რაიმე უხერხულობას გრძნობს“, - განაცხადა რუსეთის საგარეო საქმეთა მინისტრმა.