„თიბისი ბანკის“ დამფუძნებლების, მამუკა ხაზარაძისა და ბადრი ჯაფარიძის მიმართ აღკვეთის ღონისძიების შეფარდებაზე სასამართლო სავარაუდოდ, ხვალ იმსჯელებს. ამის შესახებ "ინტერპრესნიუსისთვის" გახდა ცნობილი.

თუ რა პოზიცია ექნება სახელმწიფო ბრალდებას ხაზარაძისა და ჯაფარიძის მიმართ აღკვეთის ღონისძიების შეფარდებასთან დაკავშირებით და მოითხოვს თუ არა პროკურატურა მათ პატიმრობას, ჯერ უცნობია.

ბადრი ჯაფარიძესა და მამუკა ხაზარაძეს გენერალურ პროკურატურაში ბრალი ოფიციალურად დღეს გააცნეს.

ხაზარაძე და ჯაფარიძე საგამოძიებო უწყებაში დაახლოებით ნახევარი საათის განმავლობაში იმყოფებოდნენ.

მათ სახელმწიფო ბრალდება ჯგუფურად, 16 754 000 ამერიკული დოლარის უკანონო შემოსავლის ლეგალიზაციის ედავება, რასაც თან ახლდა განსაკუთრებით დიდი ოდენობით შემოსავლის მიღება (დანაშაული გათვალისწინებული საქართველოს სისხლის სამართლის კოდექსის 194 მუხლის მე-2 ნაწილის „ა“ და მე-3 ნაწილის „გ“ ქვეპუნქტით).