დონალდ ტრამპმა ვეტო დაადო რეზოლუციებს, რომელიც არაბთა გაერთიანებული საამიროებისთვის 8,1 მილიარდი დოლარის ღირებულების იარაღის მიყიდვას ბლოკავს
აშშ-ის პრეზიდენტმა დონალდ ტრამპმა ვეტო დაადო რეზოლუციებს, რომელიც საუდის არაბეთისა და არაბთა გაერთიანებული საამიროებისთვის 8,1 მილიარდი დოლარის ღირებულების იარაღის მიყიდვას ბლოკავს.
თეთრი სახლის ლიდერის თქმით, აღნიშნული რეზოლუციები ამერიკის კონკურენტუნარიანობას გლობალურ დონეზე შეამცირებს და დააზარალებს კავშირებს მოკავშირეებთან.
დონალდ ტრამპის ვეტო კონგრესის ორივე პალატაში რეზოლუციების დამტკიცებას მოჰყვა. როგორც კონგრესის წევრები აცხადებენ, არსებობს საშიშროება, რომ იარაღი გამოიყენონ იემენის კონფლიქტში მშვიდობიანი მოქალაქეების წინააღმდეგ. მათ ასევე დაგმეს საუდის არაბეთის როლი იემენში მიმდინარე შეიარაღებულ კონფლიქტში და გასულ წელს ჟურნალისტ ჯამალ ხაშოგის მკვლელობა.
სენატი რამდენიმე დღეში გადაწყვეტს, დაძლიოს თუ არა ტრამპის ვეტო. თუმცა, ანალიტიკოსების თქმით, თითქმის უდავოა, რომ სენატში ვეტოს დაძლევას ვერ შეძლებენ, ვინაიდან ამისთვის საჭიროა ორი მესამედის მხარდაჭერა.
