სალომე ზურაბიშვილი - გამაჯანსაღებელი კურორტების თვალსაზრისით, საქართველოს შეუძლია გახდეს ევროპისთვის ძალიან მიმზიდველი ქვეყანა

ქვეყანაში სამედიცინო და სარეაბილიტაციო ტურიზმის განვითარების მხარდაჭერის მიზნით, საქართველოს პრეზიდენტი უჯარმისა და ახტალის კურორტებს ესტუმრა. ამის შესახებ ინფორმაციას საქართველოს პრეზიდენტის ადმინისტრაცია ავრცელებს.

მათი ცნობით, პრეზიდენტმა განაცხადა, რომ საქართველო მდიდარია ასეთი კურორტებით და მხოლოდ გურჯაანის რაიონში 44 სხვადასხვა სამკურნალო წყალია, რაც ადასტურებს საქართველოსთვის თერმულ წყლებთან დაკავშირებული საკურორტო ზონების განვითარების მნიშვნელობას, იმისათვის, რომ მათგან ეკონომიკური სარგებელი მივიღოთ.

,,გამაჯანსაღებელი კურორტების თვალსაზრისით, საქართველოს შეუძლია გახდეს ევროპისთვის ძალიან მიმზიდველი ქვეყანა, სადაც შეიძლება ჩამოხვიდე არა მხოლოდ დასასვენებლად, არამედ გასაჯანსაღებლად", - განაცხადა პრეზიდენტმა.

პრეზიდენტის განცხადებით, საქართველო უკვე ევროპული ისტორიული თერმული ქალაქების ასოციაციაშია გაერთიანებული და არსებობს შესაბამისი ტურისტული გზებიც.

,,ეს ჩვენი ერთ-ერთი სერიოზული რესურსია, რომელიც უნდა მაქსიმალურად შევინარჩუნოთ და ავითვისოთ. ამაზე უნდა ვზრუნავდეთ ყველა ჩვენ, ცენტრალური და ადგილობრივი ხელისუფლება",- აღნიშნა ზურაბიშვილმა.

პრეზიდენტის ადმინისტრაციის მიერ გავრცელებულ ინფორმაციაში აღნიშნულია, რომ როგორც კურორტის მენეჯერმა განაცხადა, უჯარმის კურორტი ცნობილია უნიკალური თერმული წყლებით, რომელიც შეიცავს იოდს, ბრომს და ნავთობპროდუქტებს, წყლის ფორმულა 5 წელიწადში ერთხელ მოწმდება.

„რაც შეეხება ახტალას, კურორტის წარმომადგენლების განცხადებით, იგი საქართველოში ტალახით სამკურნალო ერთადერთი კურორტია. ახტალის ტალახით მკურნალობენ ძვალ-სახსროვან, პერიფერიული ნერვული სისტემის, გინეკოლოგიურ, დერმატოლოგიურ, უროლოგიურ და სხვა დაავადებებს. საკურორტო სეზონი მაისში გაიხსნა და ნოემბრის ბოლომდე გრძელდება“, - ნათქვამია პრეზიდენტის ადმინისტრაციის ინფორმაციაში.

რამაზ საყვარელიძე - ქართულ პოლიტიკაში უშინაარსობა უნდა დამთავრდეს, თორემ ერთფეროვნებაში, როცა არც პურია და არც სანახაობა, კიდევ უფრო გაიზრდება პოლიტიკური ნიჰილიზმი
ქართული პრესის მიმოხილვა 23.09.2019
თათული ზაკალაშვილი - „ჰოთსეილი“ კონცეფციას იცვლის