ირანმა საშუალო რადიუსის ბალისტიკური რაკეტა გამოსცადა, - ამის შესახებ სააგენტო Tass-ი ტელეკომპანია Fox News-ზე დაყრდნობით იუწყება.

სააგენტოს ინფორმაციით, ამერიკელმა მაღალჩინოსნებმა Fox News-ს განუცხადეს, რომ რაკეტა „შაჰაბ-3“ ირანის სამხრეთიდან გაუშვეს, მან ჩრდილოეთის მიმართულებით დაახლოებით 960 კილომეტრი იფრინა და თეირანის მახლობლად მდებარე უდაბნოს ტერიტორიაზე დაეშვა.

აღსანიშნავია, რომ რაკეტის გაშვება თეირანსა და დასავლეთს შორის დაძაბული ურთიერთობის ფონზე განხორციელდა.

როგორც ცნობილია, სიტუაცია განსაკუთრებით მას შემდეგ დაიძაბა, რაც ირანმა სპარსეთის ყურეში ბრიტანეთის დროშის ქვეშ მცურავი ტანკერი - Stena Impero - საერთაშორისო სანაოსნო რეგულაციების დარღვევისთვის დააკავა.