დეპუტატთა ჯგუფმა „რუსთავი 2“-ის საკითხზე, შესაძლოა, საპარლამენტო საგამოძიებო კომისიის შექმნის საკითხი დააყენოს. ამის შესახებ დეპუტატმა ლევან კობერიძემ “რუსთავი2“-ის დამფუძნებლებთან დავით დვალთან და ჯარჯი აქიმიძესთან შეხვედრაზე განაცხადა. როგორც კობერიძემ აღნიშნა, ის უკვე ხედავს კომისიის შექმნის საჭიროებას.
„სიტუაციიდან და რეალობიდან გამომდინარე ვხედავთ, აქ თემა არ არის ის, რომ გამოძიებას ვაცადოთ. 7 წელია უკვე ეს საქმე არის. მე პირადად ძალიან რეალურად ვხედავ იმის საჭიროებას, რომ თუკი ეს პროცესები ძალიან სწრაფად, სამართლიანად არ წარიმართება, საგამოძიებო კომისია შეიქმნას და ეს საკითხი დავაყენოთ დეპუტატთა ჯგუფმა პარლამენტში“, - განაცხადა კობერიძემ.
თავის მხრივ, დვალისა და აქიმიძის უფლებების დამცველმა სოსო ბარათაშვილმა აღნიშნა, რომ „ეს არის მისასალმებელი და საშური საქმე, რომ შეიქმნას საგამოძიებო კომისია“.
„თუ ეს მიღწევადია, ეს იქნება ბრწყინვალე გადაწყვეტილება“, - განაცხადა სოსო ბარათაშვილმა.
შეხვედრაზე დროებითი საპარლამენტო საგამოძიებო კომისიის შექმნის საკითხზე კითხვა რეგიონულ მაუწყებელთა ალიანსის წარმომადგენელმა ნათია კუპრაშვილმა დასვა.