მაღალი ხარისხით მაქვს ეჭვი, რომ დანაშაული იყო ჩადენილი , - ამის შესახებ დეპუტატმა რომან კაკულიამ "ინტერპრესნიუსს" "თიბისი ბანკის" დამფუძნებლების, ბადრი ჯაფარიძისა და მამუკა ხაზარაძის გარშემო განვითარებულ მოვლენებზე საუბრისას განაცხადა.

"მაღალი ხარისხით მაქვს ეჭვი, რომ დანაშაული იყო ჩადენილი, როდესაც გადასახადების გადახდა არ ჩანს, ყოველთვის არ არის საქმე სწორად. ასევე დიდი იმედი მაქვს, რომ ის კვალიფიკაცია, რომელიც იქნა დასახელებული პროკურატურის მიერ, იყო გააზრებულად და სიღრმისეულად შესწავლის შედეგად. საქმის დეტალები რადგანაც არ ვიცი, ვერ გეტყვით, რამდენად ადეკვატური იყო ეს, მაგრამ კარგია, რომ გამოვიდნენ და ასეთი გადაწყვეტილება იყო მიღებული. რაც შეეხება ქართული კომპანიების აქციების დაცემას, რა თქმა უნდა, ჩვენი მასშტაბის ეკონომიკაზე ეს გავლენას მოახდენს, მაგრამ ამის გამო საქმის არწარმოება არასწორია. ეს უბრალოდ, სამწუხარო თანმდევი პროცესია, რომელიც სამწუხარო ფაქტს ახლავს თან", - განუცხადა კაკულიამ "ინტერპრესნიუსს".

მანვე განაცხადა, რომ ყველაფრის ბიძინა ივანიშვილისთვის გადაბრალება ტენდენციადაა ქცეული.

"საქართველოში ეს ტენდენციაა - ყველაფერი დაბრალდეს ბიძინა ივანიშვილს, ყველაფერს დაერქვას პოლიტიკური მოტივაცია. საერთოდ, არაფერი იმალება და დაველოდოთ მოვლენების განვითარებას. თუმცა მე ვფიქრობ, რომ კანონზომიერად მიდის ძალიან ბევრი რამ", - აღნიშნა დეპუტატმა.