20 ივნისის აქციაზე დაკავებულების მიმართ აღკვეთი ღონისძიების სახით პატიმრობის შეფარდების გამოცხადებისას სასამართლოში თემირლან მაჩალიკაშვილის დედა მედიკო მარგოშვილი შეუძლოდ გახდა. მას დახმარება მანდატურის სამსაურის თანამშრომლებმა ადგილზე აღმოუჩინეს.

დაკავებული პირების მიმართ გადაწყვეტილების გამოცხადებას სასამართლოში ხმაური მოყვა.

20-21 ივნისს, პარლამენტის წინ განვითარებულ მოვლენებზე დაწყებული გამოძიების ფარგლებში ბრალდებულ ოთხივე პირს- მორის მაჩალიკაშვილს, ილია მემარნიშვილს, ბეჟან ლორთქიფანიძეს და გიორგი ქურდოვანიძეს აღკვეთი ღონისძიების სახით პატიმრობა შეფარდათ.

სასამართლო სხდომაზე ბრალდების მხარე დაკავებულებისთვის აღკვეთის ღონისძიების სახით პატიმრობის გამოყენებას ითხოვდა. აღნიშნულ შუამდგომლობას არ დაეთანხმა დაცვის მხარე. ისინი ბრალდებულების მიმართ აღკვეთის ღონისძიების სახით გირაოს გამოყენებას ითხოვდნენ, მათი ნაწილი კი, გირაოსთან ერთად, დამატებითი შეზღუდვების დაწესებას.