დარწმუნებული ვარ, აქედან რომ გავალ და შემდეგ როცა კენჭისყრა ჩატარდება, მათ შორის, მექნება თქვენი ხმა. თქვენ მეუბნებით იუსტიციის საბჭომ რატომ დაგიჭირათ მხარიო. მე გპასუხობთ, რომ ამას ვიმსახურებდი, - ასე უპასუხა უზენაესი სასამართლოს მოსამართლეობის კანდიდატმა ლავრენტი(ლაშა) მაღლაკელიძემ საბჭოს არამოსამართლე წევრის, ნაზი ჯანეზაშვილის მიერ იუსტიციის უმაღლეს საბჭოში გასაუბრებისას დასმულ შეკითხვას.
ჯანეზაშვილმა კანდიდატს ჰკითხა, 2016 წელს, როდესაც მოსამართლედ დაინიშნა, როგორ მოახერხა იუსტიციის საბჭოს მაშინდელი შემადგენლობის მოხიბვლა, მაშინ როცა მისი კონკურენტები საკმაო გამოცდილების მქონე მოსამართლეები იყვნენ.
ლავრენტი მაღლაკელიძის თქმით, მაშინ ის თავის კომპეტენციის საფუძველზე დაინიშნა მოსამართლის თანამდებობაზე. ამასთან, მისი თქმით, ალბათ, ახლაც იმსახურებს იმას, რომ მოხვდეს უზენაესი სასამართლოს მოსამართლეობის იმ 20- კაციან სიაში, რომელსაც საბჭო პარლამენტს წარუდგენს.
„მე ჯერ იუსტიციის სკოლაში ჩავირიცხე, სკოლა რომ დავამთავრე, ჩვენი გასაუბრებები წარიმართა იმ რეჟიმში და იმ შეფასებების საფუძველზე, რითაც იუსტიციის სკოლამ შემაფასა. ვფიქრობ, რომ საკმაოდ წარმატებული ვიყავი, როგორც იუსტიციის სკოლაში სწავლის პერიოდში, ასევე იმ გამოსაცდელი ვადის პერიოდში. ზუსტად 2019 წლის 20 ივლისს, იუსტიციის უმაღლესი საბჭოს ყველა წევრმა, მათ შორის თქვენც უვადოდ გამამწესეთ. დარწმუნებული ვარ, როცა აქედან გავალ და შემდეგ კენჭისყრა რომ ჩატარდება, თქვენ ხმას მე მომცემთ. ამ მოლოდინით ვარ მოსული. ასევე ყველას იმედი მაქვს და ამ განწყობით ვარ აქ, მოსული“, - განაცხადა მაღლაკელიძემ.
ლავრენტი მაღლაკელიძე ამავდროულად, თბილისის საქალაქო სასამართლოს სისხლის სამართლის საქმეთა კოლეგიის უვადოდ დანიშნული მოსამართლეა.