მომატებული საგარეო რისკების ფონზე, საქართველოს ეროვნული ბანკი 2019 წლის რეალური მშპ-ის ზრდის პროგნოზს 4.5%-მდე ამცირებს, - ამის შესახებ საქართველოს ეროვნული ბანკის მიერ გამოქვეყნებულ მონეტარული პოლიტიკის ანგარიშშია აღნიშნული.

ანგარიშის თანახმად, სებ-ი პროგნოზს აქამდე არსებული 5%-დან , 4.5%-მდე ამცირებს. პროგნოზის გადახედვა განაპირობა რუსეთის ფედერაციის მიერ საქართველოს მიმართულებით ავიამიმოსვლის შეზღუდვის შემოღებამ, რაც წლის განმავლობაში ტურისტული შემოსავლების კლებაში აისახება და, საბოლოოდ, ერთობლივი მოთხოვნის შემცირებას გამოიწვევს.

„მიუხედავად გაზრდილი გაურკვევლობისა, წმინდა ექსპორტი, მიმდინარე პროგნოზით, მაინც დარჩება ეკონომიკური აქტივობის ზრდის მნიშვნელოვან მამოძრავებელ ძალად კონკურენტუნარიანი გაცვლითი კურსის შენარჩუნების ფონზე . თუმცა, პროგნოზის დაშვებები ასევე ითვალისწინებს ფისკალური ხარჯვის, კერძოდ კი ინფრასტრუქტურული პროექტების, და დაკრედიტების აქამდე არსებული ზომიერი ტემპებით ზრდის გაგრძელებას. მსგავსი ზრდა 2020 წლისთვისაც არის მოსალოდნელი, რის ფონზეც რეალური მშპ-ს პოტენციური დონიდან ჩამორჩენა მხოლოდ ეტაპობრივად, 2021 წლის დასაწყისისთვის აღმოიფხვრება,”-აღნიშნულია სებ-ის მონეტარული პოლიტიკის ანგარიშში.

ანგარიშის თანახზმად, 2019 წლის პირველ კვარტალში რეალური მთლიანი შიდა პროდუქტი წლიურად 4.9%-ით გაიზარდა, ხოლო მეორე კვარტალში, წინასწარი მონაცემებით, - 5%-ით.