ჩრდილოეთ კორეამ მასობრივი განადგურების იარაღის თავისი პროგრამების დასაფინანსებლად 2 მილიარდი დოლარი მოიპოვა „ფართოდ გავრცელებული და სულ უფრო დახვეწილი“ კიბერთავდასხმების გზით.
ამის შესახებ ინფორმაციას „როიტერსი“ გაეროს საიდუმლო მოხსენებაზე დაყრდნობით ავრცელებს.
მათივე ცნობით, ჩრდილოეთ კორეა თანხებს იპარავდა ბანკებისგან და კრიპტოვალუტების ბირჟებიდან.
„ფხენიანი აგრეთვე აგრძელებდა თავისი ბირთვული და სარაკეტო პროგამების სრულყოფას, თუმცა არ ჩაუტარებია ბირთვული გამოცდები და არ გაუშვია საკონტინენტთაშორისო ბალისტიკური რაკეტები“, - ნათქვამია გაერო-ს უშიშროების საბჭოს ჩრდილოეთ კორეის სანქციების კომიტეტის მიერ მომზადებულ ზემოხსენებულ ანგარიშში.
ანგარიში მომზადებულია დამოუკიდებელი ექსპერტების მიერ, რომლებიც სანქციების დაცვას აკვირდებიან ბოლო 6 თვის განმავლობაში. დაფიქსირებულია კიბერთავდასხმის 35 შემთხვევა 17 ქვეყანაში, კრიპტოვალუტების ბირჟებიდან ფულის მოპარვით ჩრდილოეთ კორეა ფულს მოიძიებდა იმ სფეროდან, რომლის გაკონტროლებაც სახელმწიფოებისთვის საკმაოდ რთულია.
გაეროში ჩრდილოეთ კორეის მისიამ ამ თემაზე „როიტერთან“ კომენტარის გაკეთება არ ისურვა.