სიმბოლურია, რომ ვლადიმერ პუტინმა შეხვედრა დაამთხვია სწორედ აგრესიის მე-11 წლისთავს, რითაც კიდევ ერთხელ აჩვენებს, რომ აგრესია არ დამთავრებულა და ოკუპაცია გრძელდება, - ამის შესახებ „ევროპული საქართველოს“ ლიდერმა დავით ბაქრაძემ რუსეთის პრეზიდენტის, ვლადიმერ პუტინისა და ოკუპირებული აფხაზეთის ე.წ. პრეზიდენტის, რაულ ხაჯიმბას შეხვედრის შეფასებისას განაცხადა.

როგორც ბაქრაძე აღნიშნავს, ქართველებმა თავი არ უნდა მოვიტყუოთ და არ უნდა ვთქვათ, რომ რუსეთთან ურთიერთობები აეწყო.

"რუსეთი და მისი პრეზიდენტი აგრძელებს ქართული სახელმწიფოს დასუსტებას და ქართული სახელმწიფოს წინააღმდეგ ბრძოლას ყველა შესაძლო საშაულებით. სიმბოლურია, რომ ეს შეხვედრა დაამთხვია სწორედ აგრესიის მე-11 წლისთავს, რითაც კიდევ ერთხელ აჩვენებს, რომ აგრესია არ დამთავრებულა და ოკუპაცია გრძელდება. თუ ამას აჩვენებს პუტინი, მითუმეტეს ეს უნდა გვესმოდეს ქართველებს და თავი არ უნდა მოვიტყუოთ იმაზე ფიქრით, რომ თუ ჩვენ, ჩვენი გადასახადის გადამხდელების ფულით დავაფინანსებთ რუსების ფრენას საქართველოში, ამით რამე შეიცვლება. რა თქმა უნდა, კარგია ტურიზმიც და ვაჭრობაც, მაგრამ თვითონ პუტინი გვეუბნება ამ შეხვედრით, რომ ის აგრძელებს აგრესიას, რომ ის აგრძელებს ოკუპაციას, რომ ის ფიქრობს დამატებით ზიანზე, მათ შორის თუნდაც სოხუმის აეროპორტის გახსნაზე. მოდით, ამ პირობებში ნუ ვითამაშებთ გულუბრყვილობანას და ნუ ვიტყვით, რომ ყველაფერი დასრულდა და რუსეთთან ურთიერთობა ავაწყეთ. ვერ ავაწყეთ და ვერ ავაწყობთ იქამდე, ვიდრე რუსეთი არ შეწყვეტს ოკუპაციას და არ გავა საქართველოდან", - განაცხადა დავით ბაქრაძემ.