ინდოეთის შტატ კერალაში მეწყერის ჩამოწოლის შედეგად სულ მცირე 28 ადამიანი დაიღუპა, - ამის შესახებ ინფორმაციას სააგენტო „როიტერსი“ ადგილობრივ ხელისუფლებაზე დაყრდნობით ავრცელებს. მათივე ინფორმაციით, მეწყერი უხვმა ნალექმა გამოიწვია.
სტიქიის გამო ევაკუირებულია 64 000-ზე მეტი ადამიანი და დახურულია კოჰინის საერთაშორისო აეროპორტი, რომელიც შტატის ყველაზე დატვირთული აეროპორტია.
სეზონური წვიმები ინდოეთში ივნისიდან სექტემბრამდე მოდის და ქვეყანას მნიშვნელოვნად აზიანებს. ამავდროულად ამ პერიოდში ქვეყანა ყოველწლიური ნალექის 70% იღებს, რაც ძალზედ მნიშვნელოვანია სოფლის მეურნეობისთვის და ეკონომიკისთვის.
შეგახსენებთ, რომ კერალაში გასული წლის აგვისტოში მომხდარმა წყალდიდობამ 200 ადამიანის სიცოცხლე შეიწირა. დაზარალდა 5 მილიონზე მეტი ადამიანი.