პატიმრობაში ყოფნის პერიოდში მისი მდგომარეობა კიდევ უფრო გართულდა, მას სამი სტენდი აქვს გულში ჩაყენებული და სერიოზული პრობლემები აქვს, - ამის შესახებ 20-21 ივნისის საქმეზე ბრალდებული ბეჟან ლორთქიფანიძის ადვოკატმა ბექა ბასილაიამ ჟურნალისტებს თბილისის საქალაქო სასამართლოში განუცხადა. ადვოკატის ინფორმაციით, სასამართლომ ლორთქიფანიძისთვის აღკვეთის ღონისძიების სახის შეცვლის გადაწყვეტილება ექსპერტიზის დასკვნის საფუძველზე მიიღო.
„მოგეხსენებათ, აღკვეთის ღონისძიება ბეჟან ლორთქიფანიძეს მოსამართლე ჩახნაშვილმა სრულიად დაუსაბუთებლად, საბჭოთა არგუმენტაციით შეუფარდა. ჩვენ იმ სხდომაზეც წარვადგინეთ სამედიცინო დოკუმენტაცია, რომელიც ადასტურებდა ბეჟანის ჯანმრთელობის მძიმე მდგომარეობას. პატიმრობაში ყოფნის პერიოდში მისი მდგომარეობა კიდევ უფრო გართულდა. მას სამი სტენდი აქვს გულში ჩაყენებული და სერიოზული პრობლემები აქვს. ჩვენ სასამართლოს წარვუდგინეთ ექსპერტიზის დასკვნა, რომელშიც საუბარია ბეჟანის ჯანმრთელობის მდგომარეობის გაუარესებაზე.
ხელისუფლებას უნდა, რომ ყველა აქტიური პატრიოტი მოქალაქე, რომელიც ღიად აპროტესტებს რუსულ გავლენებს, გავრილოვის მოღალატეობრივ ჩამოყვანას და შემოჩეჩებას, პოლიციის მხრიდან ძალადობას - ყველა ეს მოქალაქე გაანეიტრალოს. მათ შორის აღმოჩნდა ბეჟანიც",- განაცხადა ბექა ბასილაიამ.
20-21 ივნისის საქმეზე დაკავებული ბეჟან ლორთქიფანიძე პატიმრობიდან გაათავისუფლეს. მას აღკვეთის ღონისძიების სახით შეფარდებული პატიმრობა 5 000- ლარიანი გირაოთი შეუცვალეს.